תוכן השאלה
לכבוד דער ראש ישיבה שליט"א,
צום ערשט א גרויסן יישר כח פאר אלע דרשות, דאס איז מיין לופט צום לעבן, איך שפיר ווי א נייער מענטש מיט די גוטע וועגן פון הייליגן רבי'ן, בפרט מיט די עצה פון רעדן צום אייבערשטן אלעס וואס איך וויל און איך טראכט. איך בין זוכה צו לערנען די הייליגע תורה, איך האב ברוך ה' געענדיגט צוויי מסכתות.
מיר ווארטן א שמחה ברוך ה', מיין מאמע זאגט אז מ'קויפט גארנישט קיין קליידער פון פאראויס, אבער מיין שוויגער פלעגט יא איינקויפן פאראויס, ווילן מיר וויסן וואס דער ראש ישיבה שליט"א האלט וועגן דעם. ס'איז בכלל נישט קיין מחלוקת צווישן זיי, ס'איז נאר אז מיר ווילן פשוט וויסן ווי אזוי זיך צו פירן.
יישר כח
תשובה מאת הראש ישיבה שליט"א:
בעזרת ה' יתברך
יום א' פרשת ראה, כ"ג מנחם-אב, שנת תשפ"א לפרט קטן
מרת ... תחי'
איך האב ערהאלטן אייער בריוו.
די טעג, וואכן און חדשים וואס מען ווארט וכו' - דארף מען אסאך בעטן דעם אייבערשטן אז דאס קינד זאל זיין געזונט ברמ"ח אברים ושס"ה גידים, אלעס זאל גיין בנקל ובנחת.
אויך זאגט מוהרא"ש אז אין די טעג זאל מען זאגן די נעמען פון צדיקים, ווייל דער רבי זאגט (ספר המדות אות צדיק חלק ב', סימן כ): "עַל יְדֵי הַזְכָּרַת שֵׁמוֹת הַצַּדִּיקִים יְכוֹלִים לְהָבִיא שִׁנּוּי בַּמַּעֲשֶׂה בְּרֵאשִׁית, כְּלוֹמַר לְשַׁנּוֹת הַטֶּבַע", דורכ'ן דערמאנען די נעמען פון צדיקים קען מען טוישן די טבע; מען זאגט נעמען פון צדיקים וואס מען קען פון אויסנווייניג: "הייליגער באשעפער, העלף מיר בזכות אברהם אבינו, יצחק אבינו, יעקב אבינו, משה רבינו, אהרן הכהן, יוסף הצדיק, דוד המלך, שלמה המלך; העלף מיר בזכות דער הייליגער תנא רבי שמעון בר יוחאי, בזכות רבי יצחק לוריא אשכנזי, בזכות דער הייליגער רבי ישראל בעל שם טוב, בזכות דער הייליגער רבי רבינו נחמן בן פיגא מברסלב, בזכות רבי נתן מברסלב, בזכות מוהרא"ש; בזכות די הייליגע צדיקים העלף מיר איך זאל האבן גרינג, עס זאל נישט זיין קיין פראבלעמען, דאס קינד זאל זיין געזונט וכו' וכו'".
מוהרא"ש זאגט מען זאל נישט איינקויפן פאראויס; עס איז נישט כדאי צוליב עין הרע.
א כתיבה וחתימה טובה, א גוט געבענטשט יאר.