תוכן השאלה
לכבוד דער ראש ישיבה שליט"א,
מיין פיר יעריגע טאכטער האט מיר דערציילט אז די מיידלעך שפילן דאקטאר אין איר סקול אויף א נישט צניעות'דיגע וועג, איך האב גערעדט צו די מנהלת און זי האט מיר געזאגט אז זי גייט עס אפשטעלן, אבער צוויי טעג שפעטער האט מיין טאכטער מיר געזאגט אז עס גייט נאך ווייטער אן, איך האב ווידער גערעדט מיט די מנהלת און איך טראכט איר נישט צו שיקן אין שולע ביז די זאך ווערט מסודר.
איך רעד צו מיין טאכטער אז דאס איז נישט צניעות'דיג, און ווי שיין עס איז ווען א אידיש מיידל פירט זיך מיט צניעות, זי פארשטייט און זי נעמט עס אן, זי ווייסט אז עס איז נישט ריכטיג דאס צו טון, אבער למעשה ווערט זי פארשפילט.
אפשר קען דער ראש ישיבה שליט"א מיר געבן שכל און הדרכה ווי דאס אפצושטעלן אויפ'ן ריכטיגן וועג?
יישר כח
תשובה מאת הראש ישיבה שליט"א:
בעזרת ה' יתברך
יום ב' פרשת ויקהל, כ' אדר א', שנת תשפ"ב לפרט קטן
מרת ... תחי'
איך האב ערהאלטן אייער בריוו.
מען דארף מחנך זיין די קינדער פון קליינערהייט אן זיי זאלן זיך פירן איידל, זיי זאלן זיך שפילן מיט חבר'טעס איידלערהייט; נאר אזוי איז מען זוכה צו ערליכע דורות, צו נחת.
חינוך איז א שווערע עבודה; איינע פון די שוועריקייטן איז, אז מען זעט נישט גלייך די פירות. עס קען זיך דאכטן ווי מען ארבעט אומזיסט, עס זעט אויס ווי די קינדער הערן נישט וואס מען רעדט צו זיי, די קינדער טוען ווייטער וואס זיי ווילן; דאס מאכט מען זאל מיד ווערן פון רעדן און זאגן וכו', אבער עס איז נישט אזוי; יעדעס ווארט וואס מען רעדט צו קינדער אויף די ריכטיגע וועג - טוט אויף, אמאל טוט עס אויף גלייך און אמאל שפעטער, אבער יעדעס ווארט וואס מען רעדט צו די קינדער טוט אויף.
איר זאלט ווייטער רעדן צו אייערע קינדער פון די שיינקייט פון זיין איידל, פון זיך שפילן מיט חבר'טעס נאר איידלערהייט. קליינע קינדער טאר מען נישט דערשרעקן, מען דארף רעדן ווייך און שיין, עס זאל אריינגיין אין זיי שיינערהייט; מען זאגט זיי "מען טאר נישט אויפהייבן די קלייד", "קיינער זאל דיך נישט אנרירן אונטער די קליידער", און אזוי ווייטער.
אויך אסאך בעטן דעם אייבערשטן מען זאל האבן ערליכע דורות.
דער אייבערשטער זאל העלפן איר זאלט האבן הצלחה אין אלע ענינים.