י ניסן תשפ"ד

בעזרת ה' יתברך - יום ה' פרשת טהרה, י' ניסן, שנת תשפ"ד לפרט קטן

לכבוד ... נרו יאיר

מען דארף רעדן צו א ווייב מיט דרך ארץ, איידל און ווייך; א שגץ שרייט אין שטוב, א שגץ זידלט; עס לוינט נישט אלע חומרות אויב עס ברענגט צו איין פינטל כעס, אדער איין שטעך פאר די ווייב.

מוהרא"ש האט געלאכט פון די חומרות. מוהרא"ש האט דערציילט, זיין ווייב די רעבעצין האט געהאט א באבע וואס האט פסח'דיג געמאכט די טיש, אויפן טיש האט זי געלייגט א ברעט, אויפן ברעט האט מען געלייגט פאפנדעקל (קארדבאר"ד), אויפן פאפנדעקל האט מען איבערגעדעקט מיט זילבער פעפער, אויף די זילבער פעפער האט מען געלייגט אפאר טישטוכער און נאכדעם האט מען אנגעווארענט די קינדער נישט צו לייגן די טעלער אויפן טיש נאר האלטן די טעלער אין האנט.

לערן יעדן טאג דעם בלאט גמרא, דאס איז נישט קיין חומרות, דאס איז אידישקייט; מען קען נישט זיין א איד נאר אז מען לערנט יעדן טאג גמרא.

דער אייבערשטער זאל העלפן מיר זאלן שוין זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

---

בעזרת ה' יתברך - יום ה' פרשת טהרה, י' ניסן, שנת תשפ"ד לפרט קטן

לכבוד ... נרו יאיר

דער עיקר איז שמחה; טו אלע מצוות מיט שמחה, און מאך פרייליך דיין ווייב.

בעט דעם אייבערשטן: "הייליגער באשעפער העלף מיר איך זאל זיין פרייליך, איך זאל שפירן די שמחה אין אלע מיינע אברים, פון קאפ ביז די פיס, אז איך זאל אנהויבן טאנצן פון גרויס פרייד אויף די גרויסע חסד אז דו האסט מיך באשאפן א איד און מיר געגעבן די הייליגע מצוות.

אנא, איך בעט דיר, נעם אוועק פון מיר די עצבות און מרה שחורה, העלף מיר איך זאל נאר זיין פרייליך און פרייליך מאכן אנדערע, און בזכות שמחה זאל איך זוכה זיין נכלל ווערן אינגאנצן אין דיר, איך זאל מער נישט זען פאר מיינע אויגן נאר דיך באשעפער, איך זאל זען און שפירן ווי דו ביסט אלעס און עס איז מער גארנישט דא אויף די וועלט נאר דו אליין, און זוכה זיין צו תשובה שלימה, מעתה ועד עולם אמן סלה".

היינט נאכט וועט זיין די ליל שישי שיעור אין ישיבה אין וויליאמסבורג.

שבת און אויך פסח וועל איך זיין אין קרית ברסלב.

דער אייבערשטער זאל העלפן מיר זאלן שוין זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.